DC Robert C. Lalhmangaiha chuan Kolasib District chu State luhka leh ramri depa awm a nih avangin dan leh thupek kawngah inven lawk a ngaihna hrang hrang a awm thu a sawi a.

 DC chuan thenawm State Assam Sawrkar chuan tunhnaiah an ram chhunga dan lova awmte dapchhuah beihpui a thlak avangin Mizoram lama rawn luh tum an awm theih thu leh hei hian Sawrkar dan leh dun kenkawhna kawngah harsatna tam tak a thlen theih thu a sawi. 

Hemi avang hian Kolasib District chhunga Inner Line Permit(ILP) Check Post-te uluk zawka kalpui mek a nih thu leh Sawrkar hotute pawn heng Check Gate-te hi vil in an tlawh thin thu a tarlang a. DC chuan ramri depa awm khawtlang hruaitute leh mipuite pawh dan lova Mizorama rawn lutte venna kawnga an thawhna chu fakawm tiin Sawrkar hmalakna thlawp zel turin a sawm bawk a ni.

He hunah hian Kolasib District huamchhuanga Police Duty Post-te leh ILP Check Post hrang hrangte dinhmun tarlan a ni a. Check Post-te inbiakpawhna leh inkalpawhna tha neih dan tur chungchangte, thawmthat a ngaihna laite leh Police Duty Post hmun thenkhat remchang zawkna avanga a hmun sawn ngai laite sawihoin, thawktu indaihlona phuhruk dan tur sawihona neih a ni a.

 Ramri depa ILP Check Post hrang hrangte pawh tih changtlun dan tur leh 4-Lane kawngpuiin Mizoram a rawn paltlang huna a ILP Check Post leh Police Check Post turte pawh sawihona neih nghal a ni a. Kolasib District huam chhunga Rail Station-a ILP Check dan turte, Railway-a Police Duty tur mamawh a nih dante ngaihthlak niin Kolasib District huam chhunga Security lama chak zawk a hmalak a nih thei nan Police Station leh Check Post siam belh dan turte sawiho a ni bawk.

He thutkhawmah hian Sawrkar Official-te, Jt. VC Kolasib District-te, ramri dep a awm VCP-te, Jt. YMA Group hruaitute leh MZP hruaitute an tel, tih vawiina Sorkar thuchhuah chuan a tarlang.